ივენთები

Page 1 of 812345...Last »

Accor-ის სასტუმრო ჯგუფი იაპონიაში ბრენდ ibis-ის ოტელის გახსნას გეგმავს. ibis Shinjuku ტოკიოს ერთ-ერთ ყველაზე აქტიურ, კომერციულ რაიონში მდებარეობს.

სასტუმროში 206 ნომერია. ამჟამად შენობა რეკონსტრუქციის ეტაპზეა და პირველ სტუმრებს დეკემბრის შუა რიცხვებში ელოდება.

ოტელი აეროპორტ Narita-დან 90 წუთის სავალზე მდებარეობს, Haneda-ს აეროპორტიდან კი იქ მისვლას 45 წუთი სჭირდება.

სასტუმროში ცხოვრების ღირებულება 128 დოლარიდან იწყება.

შეგახსენებთ: ახლახანს Accor-მა განაცხადა, რომ ეკონომ კლასის სამ ბრენდს – ibis-ს, all seasons-სა და Etap Hotel-ს აერთიანებს. შედეგად შეიქმნება ერთიანი ბრენდი ibis-ის სახელწოდებით, რომლის შემადგენლობაშიც შევლენ ibis-ი, ibis styles-ი და ibis budget-ი.

რებრენდინგი 2013 წელს დასრულდება.

მაიამი-ბიჩის ჩრდილოეთ ნაწილში, ფლორიდას შტატში, 19 იანვარს სასტუმრო St Regis Bal Harbour Resort-ი გაიხსნება, რომელიც მომავალ წელს აშშ-ში ყველაზე ძვირადღირებული სასტუმრო პროექტი იქნება. ოტელის მშენებლობაში მილიარდი დოლარი ჩაიდება.

ბრენდ St Regis-ის წარმომადგენლები პირობას დებენ, რომ სასტუმრო თავის სტუმრებს ფუფუნების ახალ დონეს შესთავაზებენ. ოტელში 214 ნომერია, რომელთა ფანჯრებიც ოკეანეს გადაჰყურებს. გარდა ამისა, სამ, 27-სართულიან მინის შენობაში 307 რეზიდენციაა. სასტუმრო ბოლ-ჰარბორის კურორტის ქვიშის პლაჟთან მდებარეობს.

ოტელში დაინერგება სისტემა, რომელიც ლიფტში მყოფი მგზავრისთვის საჭირო სართულს ელექტრონული გასაღებით განსაზღვრავს. St Regis Bal Harbour Resort-ის მთელი ტერიტორია დაფარული იქნება Wi-Fi-თ.

ოტელის სტუმრების განკარგულებაში იქნება მოსამსახურე, სპა-ცენტრი Remède Spa, სატრენაჟორო დარბაზი და საბავშვო კლუბი.

სასტუმროს ღვინის ბარში სამხრეთ ფლორიდის მასშტაბით ღვინის ერთ-ერთი ყველაზე დიდი კოლექციაა თავმოყრილი. ახალ ოტელში ცხოვრების ღირებულება ერთ ღამეში 650 დოლარი იქნება.

Bed and Breakfast–ის კატეგორიის სასტუმროების ევროპული ბიზნესი, პრობლემების მიუხედავად, ყვავის. 2012 წლის იანვარში ქსელი Bedandbreakfast.eu ევროპაში 50 ათას პანსიონს ითვლიდა.

თავად ეს მოვლენა შედარებით ახალია: ამჟამად არსებული b&b–ის მხოლოდ 15% გაიხსნა 2000 წლამდე, 59% კი 2006 წლის შემდეგ ამუშავდა.

50 000–ე ოტელი პალერმოს Ai Vicerè გახდა.

„ბევრი სახლის მფლობელს სურს b&b–ის სასტუმროს გახსნა. ამას ხელს ეკონომიკური კრიზისი უწყობს, და ასეთი სასტუმრო მართლაც შეიძლება გახდეს შემოსავლის კარგი წყარო,“ – განაცხადა Bedandbreakfast.eu–ის დამფუძნებელმა ჰანი ჰოდმეიკერმა.

ევროპულ Bed and Breakfast–ში ღამის გატარება ორ ადამიანს საშუალოდ 74 ევრო უჯდება. ჩვეულებრივ სასტუმროში კი მათ 100–ზე მეტი ევროს გადახდა მოუწვდათ.

ფასისა და მომსახურების ხარისხის ურთიერთმიმართების გამო, პატარა ოტელები ტურისტებში სულ უფრო მეტ პოპულარობას იძენს.

ამერიკულმა საკრუიზო კომპანია Disney Cruise Line–მა განაცხადა, რომ 2013 წლიდან ხმელთაშუა ზღვაში განაახლებს კრუიზებს ფანტასტიკური ლაინერით DisneyMagic–ით.

„2013 წლის 1 ივნისს DisneyMagic–ი ბარსელონას პორტიდან გავა, რათა შთამბეჭდავი კრუიზი განახორციელოს ხმელთაშუა ზღვის სანაპიროს ქალაქებს შორის, რომლებიც მდიდარია ისტორიით, კულტურითა და გართობით,“ – ნათქვამია საკრუიზო კომპანიის ოფიციალურ განცხადებაში.

2013 წლისთვის Disney Cruise Line–ი ოთხი, 7 და 12–დღიანი კრუიზების შესრულებას გეგმავს ისეთი ქვეყნების სანაპიროებზე, როგორებიცაა ესპანეთი, საფრანგეთი, საბერძნეთი, თურქეთი, მალტა და ხორვატია.

გასულ წელს კომპანია ერთკვირიან კრუიზებს ასრულებდა, თუმცა ისინი 2012 წლისთვის გაუქმდა. 2013 წელს კი Disney Cruise Line–ი ტურისტებს უფრო მრავალფეროვან პროგრამას პირდება.

Disney Cruise Line–ი გართობის ინდუსტრიის ცნობილ კომპანიას The Walt Disney Company–ს ეკუთვნის. ამჟამად ის კრუიზებს სამი ფანტასტიკური ლაინერით – Disney Magic–ით, Disney Wonder–ითა და Disney Dream–ით ასრულებს, რომლებიც 2400–დან 4 ათასამდე მგზავრს იტევს.

ასეთი ლაინერებით მოგზაურობა საოჯახო დასვენების ერთ–ერთი საუკეთესო არჩევანია. მათზე ტარდება თემატური გართობები ყველა ასაკის მგზავრისთვის.

Disney–ს ლაინერები დამსვენებელს სთავაზობს შეხვედრას Disney–ს მხატვრული ფილმების საყვარელ პერსონაჟებთან. ბორტზე შესაძლებელია Disney–ს მიუზიკლებზე დასწრება და ღია ზღვაზე კაშკაშა ფეიერვერკებით ტკბობა.

არაბეთის გაერთიანებული საემიროების დედაქალაქში ოტელი Hyatt Capital Gate Abu Dhabi გაიხსნა. ამის შესახებ ინფორმაციას Hyatt Hotels Corporation–ი ავრცელებს. სასტუმრო იმითაა გამორჩეული, რომ მსოფლიოში ყველაზე ძლიერად, 18 გრადუსით გადახრილ ცათამბჯენშია განთავსებული.

შენობამ Capital Gate–მა, რომელიც აბუ–დაბის საგამოფენო კომპანიას ეკუთვნის, გინესის წიგნში ადგილი სწორედ გადახრის გამო მიიღო, რომელიც თითქმის 4–ჯერ აღემატება ცნობილი პიზის კოშკის გადახრის გრადუსს.

ოტელი შენობაში მე–15–დან 33–ე სართულებამდე მდებარეობს და 189 ნომერს აერთიანებს.

„ეს უნიკალური პროექტი გახდა დიზაინსა და არქიტექტურაში მოწინავე ტექნოლოგიების ხორცშესხმა, რომელმაც ახალი სტანდარტები დაამკვიდრა სტუმართმოყვარეობის ინდუსტრიაში,“ – განაცხადა სამხრეთ–დასავლეთ აზიაში Hyatt International–ის მმართველმა დირექტორმა პიტერ ფულტონმა.

კომპანიას ეკუთვნის ბრენდები: Hyatt, Park Hyatt, Andaz, Grand Hyatt, Hyatt Regency, Hyatt Place, HYATT house.

სომხეთის საზოგადოებრივი საბჭოს კულტურის საკითხების კომისია ერევნის „გამარჯვების პარკში“ „ნოეს კიდობანის“ აგებას გეგმავს.

ობიექტი ბიბლიური კიდობანის აღწერილობის მიხედვით შეიქმნება. ტერიტორია, სადაც ობიექტის აგება იგეგმება, საკმაოდ მაღალ ადგილას მდებარეობს, საიდანაც სომხეთის დედაქალაქის ხედი იშლება და არარატის მთა მოსჩანს, რომელიც თურქეთის ტერიტორიაზე, თურქეთ-სომხეთის საზღვრიდან 15 კილომეტრის დაშორებით მდებარეობს.

ახალ „კიდობანში“ პროექტის ავტორები ყველა მისი ბინადრის ზუსტ ორეულებს განათავსებენ, იქვე განთავსდება სხვადასხვა ხალხების კულტურული მემკვიდრეობის ნიმუშების მუზეუმი, გადასახედი მოედანი და სხვა ობიექტები.

ხელისუფლების განცხადებით, ეს ორიგინალური პროექტი ქვეყანაში ტურიზმის განვითარებისთვის სტიმული უნდა გახდეს.

დუბაის სასტუმრო The Address Downtown Dubai–მ, რომელიც დუბაის შუაგულში მდებარეობს, სიგარის სასტუმროს The Cigar Lounge–ის გახსნის შესახებ განაცხადა. სასტუმრო შენობის მე–13 სართულზე, გაშლილ ტერასაზე განთავსდა, საიდანაც მსოფლიოს ყველაზე მაღალ შენობაზე – ბურჯ ხალიფაზე მშვენიერი ხედი იშლება.

სიგარის სასტუმრო გულისხმობს ელიტური სასმელებითა და დახვეწილი კერძებით მომსახურებას, ასევე 40 მარკაზე მეტი სიგარის არჩევანს, რომლებიც მთელი მსოფლიოდანაა შეკრებილი. თბილი ატმოსფეროს სასიამოვნო დამატებაა ჯაზური მუსიკა.

The Address Downtown Dubai–ს გენერალური დირექტორის ფილიპ ზუბერის განცხადებით, The Cigar Lounge–ი შეიქმნა სპეციალურად იმ დამსვენებლებისთვის, ვინც მაღალ სტილსა და ცხოვრების ხარისხს აფასებს.

„სასტუმრო გაახარებს მათ, ვინც განმარტოებასა და ნამდვილ კომფორტს ეძებს,“ – აღნიშნავს ზუბერი.

The Cigar Lounge–ი ყოველდღე, 18–დან დილის 2,30 საათამდე მუშაობს.

იტალიაში გაიხსნა სასტუმრო, სადაც ყველაფერია გათვალისწინებული ალერგიული ადამიანებისთვის. 4-ვარსკვლავიანი ეკოოტელი Tirler Dolomites Living-ი ზღვის დონიდან 1752 მეტრის სიმაღლეზე მდებარეობს და სტუმრებს ოთხი ტიპის ნომრების არჩევანს სთავაზობს – Saslong-ს, რომელიც 2-4 ადამიანს იტევს; Dolomit-ს, რომელიც 2-6 ადამიანზეა გათვლილი, სიუიტ Curasoa-ს, სადაც 2-5 ადამიანს შეუძლია ცხოვრება და Tirler Alm-ს, რომლის ფართი 25 კვადრატული მეტრია და სადაც მხოლოდ 2 ადამიანის განთავსებაა შესაძლებელი.

სასტუმრო რბილწიწვიანი ხისა და ევროპული ფიჭვისგანაა აგებული. ნომრების კედლები კი თიხითაა დაფარული, რისი წყალობითაც ოთახები ბუნებრივი გზით თბება და ელექტრო გამათბობლის გამოყენების აუცილებლობა აღარ არის. მცენარეების რაოდენობა მინიმუმამდეა დაყვანილი, რათა სტუმრები ყვავილის მტვერმა არ შეაწუხოს. რესტორნის მენიუში შედის სპეციალური კერძები ვეგეტარიანელებისა და ალერგიული ადამიანებისთვის.

სასტუმროს ნომრის დაჯავშნა ინტერნეტის საშუალებითაა შესაძლებელი.

ჰოლანდიელმა ბიზნესმენმა ჯიმ ჰალფენსმა ტურისტულ ბაზარზე ახალი მომსახურება გამოიტანა – მისი კომპანია „განქორწინების სასტუმრო“ (Divorce hotel) კლიენტებს სთავაზობს ოტელში დასახლებას და რამდენიმე დღეში განქორწინების გაფორმებას.

კომპანია ოჯახებს ჰოლანდიის საუკეთესო სასტუმროებში აბინავებს, სადაც მათ ადვოკატები ხვდებიან და პროცესის ყველა დეტალს უთანხმებენ, რაც წყვილებს დროის, ფულისა და ნერვების დაზოგვის საშუალებას აძლევს.

კლიენტებისადმი კომპანიას აუცილებელი მოთხოვნა აქვს – მხარეებს ერთმანეთში მშვიდი ურთიერთობა უნდა ჰქონდეთ. თუკი მეუღლეები ერთმანეთს არ ელაპარაკებიან ან მუდმივად ჩხუბობენ, კომპანია მათ დახმარებაზე უარს ამბობს.

„განქორწინებების სასტუმროს“ მომსახურება 2500 ევრო ღირს. ბიზნესმენის გეგმებში შედის ფილიალების გახსნა ამერიკის შეერთებულ შტატებსა და გერმანიაში.

ფხუკეთთან და ანდამანის სანაპიროზე არსებული მარჯნის რიფების მდგომარეობა მნიშვნელოვნად გაუმჯობესდა იმასთან შედარებით, რაც 2010 წელს იყო. როგორც ეკოლოგები აღნიშნავენ, გლობალურმა დათბობამ და გარემოს დაბინძურებამ ანდამანის ზღვასა და სიამის ყურეში მარჯნები თითქმის გაანადგურა.

მარჯნების გადაშენებისა და გაუფერულების გამო ტაილანდის ზღვისა და სანაპიროების რესურსების დეპარტამენტი გამოვიდა ინიციატივით, დაიხუროს სურინისა და სიმილანის ნაციონალური პარკების ნაწილი, რათა გადაგვარების ზღვარზე მყოფი მარჯნების სახეობები გადარჩეს.

Phuket Gazette–ის ინფორმაციით, დროულად მიღებული ზომების წყალობით მარჯნების ნახევარზე მეტი დაზიანების შემდეგ აღდგა.

Page 1 of 812345...Last »